Cristiano Ronaldo e nisi nga stoli supersfidën e të hënës ndaj Liverpoolit dhe luajti vetëm pak minuta në fundin e ndeshjes të cilën Manchester United e fitoi 2-1, duke gjetur kështu suksesin e parë sezonal.
Por ndërkohë që ishte duke kryer nxehjen e zakonshme para ndeshjes, portugezi u afrua në studion e improvizuar të SKy Sport, për të përshëndetur dy miqtë e tij, ish-futbollistë të Manchester United si Gary Neville dhe Roy Keane.
Në panel ishte edhe ish-mbrojtësi i Liverpoolit, Jamie Carragher, i cili u injorua nga Ronaldo, pasi vetëm pak më parë po thoshte në lidhje direkte se portugezi po përgatitet për t’u larguar nga Manchester United në ditët e fundit të merkatos.
Portugezi takoi fillimisht me shumë përzemërsi Neville, më pas kaloi pranë Carragher i cili i zgjati mikrofonin, por CR7 e inoroi dhe shkoi të përqafojë edhe Roy Keane, megjithatë ish-mbrojtësi i Liverpoolit e kaloi me sportivitet këtë situatë.