Atletico e Madridit nuk shkoi dot përtej barazimit pa gola ndaj Granadës së Myrto Uzunit, duke humbur kështu një mundësi të mirë për të vulosur njëherë e mirë renditjen në zonën Champions në la Liga.
“Los Colchoneros” kërkuan me ngulm golin, por nuk arritën të konkretizojnë, ndonëse trajneri Simeone hodhi në fushë të katër sulmuesit që kishte në dispozicion, Correan e Griezmann nga minuta e parë dhe Cunha e Suarez në pjesën e dytë nga stoli.
Momenti më interesant ishte ai i minutës së parë shtesë, kur trajneri argjentinas i dha mundësinë e debutimit, djalit të tij, Giuliano Simeone, i cili është vetëm 19-vjeç dhe është rritur në akademitë e Atleticos së Madridit.
Djali i vogël i Diego Simeones ka luajtur 48 ndeshje dhe ka shënuar 26 gola te Atletico Madrid B, ndërsa në skuadrën e parë debutoi mbrëmjen e djeshme, duke luajtur 4 minuta, gjatë të cilave fitoi dy faulle dhe uli një top të bukur për Suarez, që nuk u shfrytëzua.