Është zhvilluar sot java e 16-të në Maqedoninë e Veriut, kampionat që po dominohet nga skuadrat shqiptare. Struga kryesuese iu fal golit me kokë të Darko Ilieskit në pjesën e dytë për të thyer 1-0 Akademija Pandev.
Ky ishte suksesi i tretë radhazi për skuadrën shqiptare, që kryeson kampionatin me 36 pikë duke u shpallur kampione dimri. Struga numëron pesë më shumë se Shkupi, por kampionët në fuqi kanë luajtur një ndeshje më pak. Bardhekaltrit triumfuan 3-1 në kryeqytet përballë Bregalnicas.
Të parët kaluan miqtë në avantazh falë golit të kolumbianit Herrera, por Shkupi përmbysi gjithçka nëpërmjet realizimeve të Freddy Alvarez, Kristijan Trapanovskit dhe Pepi Gorgiev. Kjo ishte fitorja e tretë radhazi për “Shvercerat”.
Feston edhe Shkëndija, që ngjitet në kuotën e 28 pikëve. Kuqezinjtë nga Tetova dolën me tri pikë nga transferta me Makedonija GP. Dygolëshi i Ljupche Doriev dhe goli i kapitenit Ferhan Hasani rikthyen Shkëndijën te fitorja pas katër javëve pa pikë të plota.
