Anglia bindi, fitoi dhe dëfreu tifozët në sfidën e parë të Kupës së Botës Katar 2022. Kombëtarja e drejtuar nga Gareth Southgate, mposhti 6-2 Iranin në takimin e parë të grupit B, aty ku bëjnë pjesë edhe SHBA dhe Uellsi. “Tre Luanët” e nisën takimin në sulm, Harry Maguire pretendoi për një penallti, më pas u ndal nga traversa, teksa 10 minutat e fundit të pjesës së parë ishin emocionuese dhe sollën shpërthimin e Anglisë.
Jude Bellingham, Bukayo Saka dhe Raheem Sterling realizuan golat e parë në një Botëror, duke dërguar “Tre Luanët” në pushim në avantazh të trefishtë. Talenti i Arsenalit gjeti golin e dytë personal në pjesën e dytë. Sulmuesi i Portos, Mehdi Taremi ishte autori i golave për Iranin (i dyti me penallti), teksa pati festë edhe për Marcus Rashford dhe Jack Grealish. Sulmuesi i United shënoi pak sekonda pasi ishte futur në fushë, teksa një minutë përpara fundit erdhi edhe goli i lojtarit të Man City.
Festë angleze në stadiumin “Khalifa International Stadium”, aty ku nuk munguan edhe protestat e tifozëve iranianë, të cilët shpalosën pankarta me shkrimin: “Gra, Jetë, Liri”, ndërkohë që lojtarët e Iranit nuk kënduan himnin kombëtar, si protestë ndaj regjimit në Republikën Islamike të Iranit. E veçanta e kësaj ndeshjeje ishte koha shtesë. Në total u akorduan 27 minuta shtesë: 14 në pjesën e parë dhe 13 të tjera pas përfundimit të fraksionit të dytë, një rekord absolut në një Botëror!
Kupa e Botës
Katar 2022
Grupi B
ANGLI-IRAN 6-2 (Bellingham 35′, Saka 43′, 62′, Sterling 45+1′, Rashford 71′, Grealish 89′ / Taremi 65′, 90+13′ (pen))
Kronika e ndeshjes:
90+13′ Irani fiton një penallti falë VAR-it. Mehdi Taremi ekzekuton saktë, gjen golin e dytë personal dhe bën disi më pak të dhimbshme disfatën e thellë të ekipit të tij.
90+8′ Irani pranë golit të dytë, por gjuajtja potente e Sardar Azmoun ndalet në traversë.
89′ Feston edhe Jack Grealish, i cili vulos suksesin tenistik të Anglisë pas asistit të Callum Wilson.
71′ Marcus Rashford shënon pak sekonda pasi u fut në fushë. Sulmuesi i Manchester United merr një pasim nga Kane, shmang bukur një mbrojtës kundërshtar dhe dërgon topin në rrjetë.
65′ Reagon Irani, i cili shkurton rezultatin me golin e Mehdi Taremit, sulmuesit të Portos, i cili shfrytëzoi në maksimum një asist të bukur të Ali Gholizadeh.
62′ Vjen edhe goli i katërt. Bykayo Saka vallëzon në zonën iraniane dhe gjen cepin e portës falë një gjuajtjeje të saktë, duke realizuar golin e dytë në këtë sfidë.
45+11′ Irani kërcënon portën e Pickford, por gjuajtja e Alireza Jahanbakhsh është e pasaktë.
45+1′ Vjen edhe goli i tretë për Anglinë, Asist i Harry Kane, gol i bukur i Raheem Sterling, i pari për të një Botëror.
43′ Anglia realizon edhe golin e dytë. Maguire ul një top nga këndorja për Bukayo Saka. Talenti i Arsenalit tund rrjetëm falë një gjuajtjeje fantastike.
35′ Anglia në avantazh. Krosim i Luke Shaw dhe finalizim i bukur me kokë i Jude Bellingham. Festë angleze në stadium.
32′ Këndore për Anglinë. Kroson Trippier, gjuan me kokë mbrojtësi Maguire, traversa shpëton iranianët.
30′ Aksion i bukur i skuadrës së Southgate, Saka pason për Mount, por kthesa e lojtarit të Chelsea përfundon jashtë.
8′ Mundësi e mirë për Anglinë. Kapiteni Harry Kane kroson në zonë, Harry Maguire nuk e devijon në portën kundërshtare.
3′ Anglia pretendon për penallti. Harry Maguire “përqafohet” në zonën iraniane, por arbitri kryesor, braziliani Raphael Claus, vazhdon lojën.
Gareth Southgate nuk “zhgënjen”. Trajneri i Anglisë ka përzgjedhur Harry Maguire në formacionin titullar ndaj Iranit. Edhe pse është shndërruar në lojtar stoli te Manchester United, Maguire mbetet i besuari i teknikut të “Tre Luanëve”, që edhe në konferencën për shtyp para sfidës deklaroi: “Harry është një lojtar teknikisht lart me topin”.
Lojtarët e tjerë të mbrojtjes në formacionin titullar janë Kieran Trippier, John Stones dhe Luke Shaw. Declan Rice, Jude Bellingham e Mason Mount formojnë treshen mesfushës, ndërsa në sulm rreshtohen Bukayo Saka, Raheem Sterling dhe Harry Kane.
FORMACIONET ZYRTARE
