Liverpooli po kalon një mini-krizë në këtë fillim sezoni të Premier Leagues, teksa pas dy barazimeve radhazi, ka pësuar edhe humbjen e parë, atë në transfertën ndaj Manchester United në “Old Trafford”.
Goli i parë i vendasve, i shënuar nga Jadon Sancho pas një aksioni mjaft të bukur, ishte ai që prishi disi qetësinë e “the reds”, teksa James Milner u pa të debatonte ashpër me liderin e prapavijës, Virgil Van Dijk.
Ky i fundit mbeti i palëvizur në momentin që Sancho goditi portën, ndërsa përveç Milner, ka marrë kritika edhe nga ish-mbrojtësi i Liverpool, Jamie Carragher, i cili deklaroi se e sheh shpesh të përgjumur holandezin.
“Virgil Van Dijk është një mbrojtës fantastik, që ka gjithçka për të qenë më i miri, megjithatë ndonjë herë e shoh të hutuar. Një futbollist si ai, nuk mund të ndjekë si spektator lëvizjet e Sanchos dhe të shohë golin. Milner ka të drejtë, pasi Virgil duhej të ishte hedhur në sparkatë për të bllokuar goditjen e Sanchos, por në vend të kësaj, qëndroi pa lëvizur duke zënë edhe rrezen e portierit”, u shpreh Carragher.
