Sassuolo rigjeti fitoren në Serie A pas dy humbjeve identike ndaj Interit dhe Atalantës, teksa vjen më në fund suksesi i parë sezonal për Sampdorian. Skuadra e Alessio Dionisit triumfoi 2-1 me përmbysje ndaj Hellas Verona.
Ekipi mik kaloi shpejt në avantazh me anë të Federico Ceccherini (2’), por francezi Armand Lauriente riktheu baraspeshën gjysmë ore më vonë. Sassuolo insistoi për golin e fitores, të cilin e gjeti nëpërmjet Davide Frattesit (74’).
Sampdoria fitoi 0-1 “finalen” e mbijetesës në fushën e Cremoneses. Vendasit patën një shans të artë për të kaluar në avantazh në minutën e shtatë, por penalltia e ekzekutuar nga Cyriel Dessers u prit nga Emil Audero.
Sampdoria ruajti momentin e vet dhe 12 minuta përpara fundit gjeti golin e shumëpritur me anë të Omar Colley, i cili shfrytëzoi një asist të Manolo Manolo Gabbiadinit, duke i dhuruar ekipit nga Xhenova tri pikët e para në kampionatin italian.