Manchester United reagoi pas humbjes ndaj Arsenalit. Skuadra e Erik ten Hag fitoi 0-3 gjysmëfinalen e parë të EFL Cup ndaj Nottingham Forest në transfertë, sfidë që u vendos në pjesën e parë.
Marcus Rashford zhbllokoi takimin në minutën e gjashtë pas një inkursioni nga mesi i fushës, duke barazuar rekordin e Carlos Tevez me gjashtë gola në këtë kompeticion në sezonin 2008/2009.
Vendasit barazuan sfidën në minutën e 23’ falë golit të Sam Surridge, por VAR-i e anuloi për pozicion të parregullt. De Gea kreu një pritje fantastike ndaj Scarpa (27’), ndërkohë që Wout Weghorst (45’) shënoi golin e dytë për United dhe të parin për të me skuadrën e re.
Djemtë e Ten Hag goditën traversën me Christian Eriksen (54′), ndërkohë që Bruno Fernandes shënoi golin e tretë për ekipin e Ten Hag një minuta përpara fundit, duke e kthyer në formalitet duelin e kthimit në “Old Trafford”.
Ndërkohë, Barcelona iu fal golit të Ousmane Dembele (52’) për të thyer 1-0 Real Sociedad dhe për të siguruar kualifikimin në gjysmëfinalet e Kupës së Mbretit. Skuadra baske luajti me dhjetë lojtarë që prej minutës së 40’ pas daljes me të kuq të Brais Mendez.
