Myrto Uzuni rikthehet te goli pas katër ndeshjesh në LaLiga 2. Sulmuesi i kombëtares realizoi golin numër 21 në këtë sezon teksa shënoi të dytin për Grandaën në ndeshjen që këta të fundit fituan në shtëpi ndaj Las Palmas me rezultatin 2-1. Në minutën e 41-të, 27-vjeçari u shkëput bukur nga mbrojtësit kundërshtarë teksa ishte i pakapshëm duke shfrytëzuar shpejtësinë që e karakterizon.
Në duelin një për një me portierin kundërshtar, Uzuni nuk fali dhe tundi rrjetën e kundërshtarëve duke e konfirmuar këtë sezon si më të mirin në karrierë.
Granada ia doli ta ruante avantazhin deri në fundin e ndeshjes, pavarësisht se miqtë shënuan një gol në fraksionin e dytë. Pas këtij trepikëshi, Granada ngjitet në vendin e dytë me 64 pikë duke parakaluar në klasifikim pikërisht Las Palmas teksa e udhëhequr nga Uzuni, është gjithnjë e më pranë rikthimit në elitën spanjolle.
Lexo edhe:
