Tirana nuk ia doli të fitonte përballë Teutës, duke e shtyrë festën e titullit. Gjithsesi, bardheblutë kryesojnë me 10 pikë mbi Laçin ndjekës kur kanë mbetur për t’u luajtur edhe katër javë kampionat.
Në barazim 1-1 përfundoi dueli ndaj bregdetarëve të Renato Arapit, teksa Redon Xhixha, i cili u fut në fushë në pjesën e dytë, u ndëshkua me karton të kuq në minutat e fundit të sfidës.
Sulmuesi kurbinas nuk e priti mirë një faull kundër tij dhe shkelmoi topin në drejtim të arbitrit Laver Alla. Ky i fundit i drejtoi menjëherë kartonin e kuq sulmuesit të Tiranës, i cili humbet derbin me Partizanin bashkë me Najdovskin (ka plotësuar numrin e kartonëve).
Ky gjest mund të jetë objekt shqyrtimi nga Komisioni i Disiplinës. Tifozët, të cilët ishin përgatitur për titullin, humbën qetësinë dhe filluan të hidhnin shishe në fushë dhe flakadanë. Ndaj arbitrit protestoi ashpër edhe Tefik Osmani, drejtori sportiv i Tiranës.