Në javën e nëntë të kampionatit në Rusi, Zenit i Shën Peterburgut regjistroi një fitore të madhe në shtëpi me shifrat 8-0 ndaj Orenburgut. Vendasit dhuruan spektakël në shtëpi duke mos i toleruar në asnjë moment kundërshtarët, ndërsa qershia mbi tortë ishte goli i shtatë i realizuar nga ana e Malcolm.
Braziliani realizoi në mënyrë spektakolare me roveshatë brenda zonës duke lënë të shtangur portierin kundërshtar i cili nuk mund t’ia evitonte kënaqësinë e golit ish-lojtarit të Barcelonës që hedh kështu kandidaturën për Çmimin Puskas. 25-vjeçari ka nisur sezonin e pestë në Rusi me Zenitin dhe tashmë duket se është shndërruar në liderin e skuadrës pasi në 9 ndeshje ia ka dalë të realizojë 6 gola.