Numri tre i botës në tenis ka nxjerrë në pah versionin e tij më të errët teksa në një ndeshje në disiplinën çift, në një kompeticion në Meksikë, nuk kontrolloi nervat e tij duke reaguar ashpër ndaj arbitrit të sfidës.
Zverev i cili ishte në këtë lojë së bashku me brazilianin Marcelo Melo teksa sfidonin dyshen Lloyd Glasspool dhe Harri Heliovaara, dolën të mposhtur nga takimi mirëpo për kampionin olimpik, disfata i faturohej arbitrit.
Në këtë formë, gjermani i afrohet vendit ku qëndronte arbitri ndërsa nisi ta ofendonte me fjalët më banale, para se të kalonte në veprimin e rëndë ku me raketën e lojës goditi në mënyrë të përsëritur shkallët në anë të fushës.
Sigurisht, një gjest i cili nuk mund të kalonte pa u dënuar dhe tashmë Zverev është përjashtuar nga kompeticioni e nuk mund të marrë pjesë në ndeshjet e radhës ku do të garonte i vetëm dhe jo në çift. Sakaq, Zverev disa orë më pas ka reaguar në rrjetet sociale duke bërë të ditur se e ka kuptuar gabimin dhe se ishte i penduar për veprimet e tij.
