Askush nuk mund të parashikonte, që pas vetëm gjashtë javëve kampionat, Partizani të kishte plot 8 pikë më pak se ekipi kryesues i Ligës Superiore, Skënderbeu, ndoshta as tifozët më fanatikë të klubit korcar. “Të “kuqtë” po provojnë të ringrihen, teksa numërojnë dy fitore rresht, megjithatë ndeshja e radhës në Shkodër përbën një test të rëndësishëm për skuadrën e Iulianos, duke patur parasysh rivalitetin historik mes dy klubeve.
Pavarësisht se rrezikoi seriozisht deri në çastet e fundit për të rënë një kategori më poshtë Vllaznia ndikoi ndjeshëm në titullin e edicionit të kaluar, duke e çuar në plot 24 numrin e viteve pa kampionat për klubin kryeqytetas. Partizani barazoi 3 nga 4 përballjet e sezonit të kaluar, sidoqoftë edhe këtë herë gjërat pritet të jenë sërish të vështira, sepse vendasit po përjetojnë momente të vështira, pas dorëheqjes së Armando Cungut.
Drejtuesit e klubit shkodran i kanë besuar ekipin trajnerit që fitoi titullin e sezonit të kaluar me Kukësin, Ernest Gjokës dhe 47-vjecari do të bëj çmos që të përfitojë nga motivimi që përcjell natyrshëm rokada e trajnerëve në drejtim. Mbi të gjitha Gjoka ka detyrën e vështirë për të gjetur zgjidhje në fazën sulmuese, pasi “kuqeblutë” kanë shënuar vetëm 3 gola në gjashtë ndeshjet e këtij edicioni, për më tepër Vllaznia numëron një muaj e gjysmë pa fitore, në kampionat.
Dy ekipet ndahen nga vetëm 3 pikë në tabelën e renditjes, gjithsesi të vetmen fitore skuadra shkodrane e ka siguruar jashtë fushe ndaj Lushnjës, në javën hapëse, pasi në stadiumin ‘Loro Boriçi’, kuqeblutë nuk marrin 3 pikë të plota që nga 12 marsi, kur një 11-metërsh i shndërruar në gol nga Elis Bakaj mjaftonte për të triumfuar ndaj Laçit.
Pavarësisht fitores së vuajtur në Durrës dhe 3 pikëve ndaj Luftëtarit edhe Partizani ka problemet e veta, sepse përvec dyshes që dihet prej kohësh Edgar Cani – Arbnor Fejzullahu, do të mungojë gjithashtu edhe sulmuesi shkodran Xhevahir Sukaj, që ka shënuar gjysmën e golave të këtij ekipi, ndërsa Gëzim Krasniqi nuk do të jetë për shkak të kartonit të kuq të marrë në Tiranë, ndaj skuadrës gjirokastrite, ndërkaq lajmi i mirë vjen nga reparti i tërhequr, pasi portieri Alban Hoxha dhe mbrojtësi Renato Malota u stërvitën bashkë me grupin tjetër të lojtarëve.
Kurioz është fakti që në Shkodër tre përballjet e fundit ndërmjet tyre kanë prodhuar rezultatin 1-1, sidoqoftë në orën 14:00, në stadiumin ‘Loro Boriçi’ pritet që kjo klasike e futbollit shqiptar të afrojë shumë spektatorë, për më tepër nga klubi i kuq mësohet se do të jenë afërsisht rreth 500 tifozë të Partizanit që do të udhëtojnë drejt Shkodrës për të ndjekur këtë takim.
Vllaznia – Partizani, do të startojë në orën 14:00 dhe do të transmetohet nga Supersport.