Diçka me tepër se një muaj më parë, fill pas humbjes së Vllaznisë në shtëpi ndaj Bylisit, nëpër media u shpërnda lajmi se trajneri Thomas Brdaric nuk do të drejtojë më kuqeblutë për shkak të mungesës së rezultateve.
Një situatë momentale që pati reagimin e futbollistëve të cilët kërkuan rikthimin e teknikut. Kjo kërkesë mori edhe miratimin e drejtuesve dhe ashtu siç funksionin një skuadër, të gjithë premtuan që shumë shpejt ekipi do të rikthehet tek suksesi.
Ky premtim nuk vonoi, gjithçka u rikthye në normalitet dhe ishte pikërisht sfida e Kupës së Shqipërisë që riktheu humorin te Vllaznia. Fill pas atij takimi humbja është një kujtim i largët për shkodranët, teksa kualifikimi në finalen e Kupës së Shqipërisë ishte një tjetër moment tepër pozitiv i ekipit.
Suksesi i fundit ndaj Apolonisë në shifrat 6-0 ndonëse kundërshtari po kalon çaste të vështira, sërish fakti që u gjet 6 herë rruga e rrjetës tregon moralin e lartë që kanë kuqeblutë. I qëndrojnë pranë kreut me vetëm 2 pikë distancë dhe tashmë kur kanë mbetur pak xhiro nga fundi, Vllaznia do të tentojë me çdo kusht të ngrejë lart trofeun e titullit kampion që ishte dhe objektivi primar i klubit.