Ndeshja e kthimit ndaj AEL Limasolit ishte e fundit e Eni Imamit me fanellën e Vllaznisë, pasi mbrojtësi kryeqytetas ka vendosur të rikthehet te klubi ku e ka nisur karrierën, Dinamo, që është rikthyer sërish në elitën e futbollit në vend.
Pas përshëndetjes emocionuese me tifozët në përfundim të ndeshjes të enjten në “Loro Boriçi”, ka ardhur edhe komunikata zyrtare e klubit të Vllaznisë, që njofton se ka mbyllur bashkëpunimin me Eni Imamin dhe falënderon futbollistin për kontributin e dhënë me fanellën kuqeblu.
Nuk ka munguar as reagimi i mbrojtësit kryeqytetas, që nëpërmjet një postimi në rrjetet e tij sociale, ka pranuar se “divorci” me shkodranët është një nga momentet më të vështira të karrierës së tij, teksa nuk ka ngurruar të falënderojë të gjithë njerëzit me të cilët ka punuar në Shkodër e fansat e zjarrtë kuqeblu.
“Pa dyshim që është një nga momentet më të vështira për një futbollist kur ndahet nga një ambient ku është përshtatur, ka gjetur dashuri, ngrohtësi, përkrahje e respekt! Me këtë postim që e zgjodha si më të veçantin, dua t’ju them gjithë popullit kuq e blu FALEMINDERIT nga shpirti për çdo gjë. FALEMINDERIT stafit teknik, Thomas Brdariç, Elvis Plori, Safet Osja, Ideal Lekiqi, shokut tim, drejtorit Matko Djarmati që ngulmoi të isha pjesë e Vllaznisë, Znj.Voltana Ademi, Z. Alban Xhaferri, shokët e mi të ekipit që janë pa përjashtim fantastikë! Krenar që isha pjesë e juaja & më falni nqs. kam gabuar diku, dikur, por kurrë me qëllim! Urimet më të mira për ju nga një tironc që dha gjithçka për të ngrit lart emrin e qytetit të Shkodrës!”, shkroi Imami në rrjetet sociale.