Sulmuesi shqiptar, Giaccomo Vrioni vijon të mrekullojë në Bundesligën austriake. Sulmuesi i huazuar te Swarovski Tirol prej Juventus ka shënuar në ndeshjen e raundit të 20-të të elitës së futbollit në Austri kundër ekipit të Ried në transfertë.
Ndonëse ndeshja është mbyllur me fitoren e vendasve me shifrat 3-2, Vrioni ishte autori i golit të dytë për Tirolin, duke realizuar në minutën e 90+1.
Shqiptari është kthyer në një nga emrat kryesorë te ekipi austriak dhe deri më tani në këtë sezon ka realizuar plot 11 gola, në 16 ndeshje ku ka luajtur në të gjitha garat.
Giaccomo Vrioni është i huazuar te austriakët deri në fund të qershorit të këtij viti dhe ndonëse ende nuk dihet a do rikthehet te Juventus, por ky sezon kaq produktiv i sulmuesit shqiptar duhet ta ketë habitur “Zonjën e Vjetër”.
