Philippe Coutinho erdhi nga pankina në sfidën mes Bayernit të Mynihut dhe Barcelonës, dhe vulosi turpërimin e katalanëve, duke shënuar dy herë në minutat e fundit dhe duke fiksuar rezultatin final 8-2.
Fantazisti brazilian është në pronësi të skuadrës katalane, por i huazuar për një sezon te gjigantët bavarezë, ndaj në përfundim të aventurës në Ligën e Kampionëve do të rikthehet sërish në “Camp Nou”.
Fillimisht ishte folur që Barcelona po punonte për një shitje përfundimtare të Coutinhos në kampionatin anglez, atje ku adhuruesit e brazilianit janë të shumtë, por duket se tani gjërat kanë ndryshuar dhe futbollisti mund të mbetet në Katalunjë.
Kjo pasi në pankinë pritet të ulet një emër si Ronald Koeman, i cili pëlqen të punojë me futbollistë teknikë dhe plani i drejtuesve të Barcelonës është që të mbajnë Coutinhon për të paktën një sezon, me qëllim që ti vlerësojnë kartonin, pasi momentalisht askush nuk ofron më shumë se 70-80 milionë euro për të.
Barcelona shpenzoi thuajse dyfishin për të marrë futbollistin në janar të 2018-ës nga Liverpooli, ndërsa mediat spanjolle raportojnë se edhe vetë trajneri Koeman ka kërkuar që ta ketë brazilianin në dispozicion me synimin për ta rilindur dhe për ta rikthyer në formën e tij më të mirë.
