Vushtrria nuk shkoi më shumë se një barazim 2-2 për ballë Flamurtarit në sfidë ne parë të vlefshme për javën e 28 të IPKO Superligës së Kosovës, rezultat ky që ia pret edhe matematikisht biletën për një kategori më poshtë.
Vendasit janë ngjitur pikërisht një vit më parë në ligën kryesore të futbollit kosovar, por gjatë këtij sezoni nuk ia kanë dalë të garojnë denjësisht, duke u rikthyer shumë shpejt andej nga erdhën.
Sa i përket kronikës së ndeshjes së sotme, kuqezinjtë nga kryeqyteti kaluan dy herë në avantazh, fillimisht me Zeqirin dhe më pas me Stullqakun, ndërsa vendasit u përgjigjën duke rikthyer baraspeshën një herë me Fazlliun e një herë me Sie.
Barazimi u vlen shumë kryeqytetasve, që tani shkojnë 5 pikë larg zonës së ftohtë të renditjes, ndonëse gara pritet të jetë mjaft interesante deri në javën e fundit, pasi një skuadër si Trepça ’89 po bën gjithçka për të siguruar mbijetesën.
Kujtojmë që këtë sezon nga IPKO Superliga do të rrëzohen 4 skuadrat e pozicionuara të fundit në renditje dhe do të ngjiten vetëm dy, pasi sezoni i ardhshëm do të startojë me 10 skuadra pjesëmarrëse. Deri tani e kanë prerë biletën për një kategori më poshtë Dukagjini dhe Vushtrria, të cilave shumë shpejt mund t’u bashkohet edhe Ferizaj.
