Vendi i 16-të në klasifikimin e Premier League, vetëm 8 pikë të grumbulluara në 9 javët e para dhe për më tepër një humbje e rëndë në shtëpi me shifrat 0-3 në ndeshjen e fundit ndaj debutuesve të Brighton. Ecuria e West Ham në këtë sezon nuk ka qenë aspak pozitive por pavarsisht formës së dobët drejtuesit e klubit londinez kanë vendosur të konfirmojnë në stol të paktën për momentin trajnerin Slaven Bilic.
Megjithatë pozicioni i teknikut kroat edhe pas këtij konfirmimi vazhdon të jetë në pikëpyetje të madhe me krerët më të lartë të klubit të West Ham që kanë kontaktuar edhe Walter Mazzarri-n, i cili në rast të një tjetër rezultati negativ mund të jetë pasuesi i Bilic.