Donis Avdijaj gjithnjë e më larg skuadrës holandeze Willem II. Mediet vendëse kanë raportuar se drejtuesit e kanë nxjerrë në shitje futbollistin, pasi nuk bën më pjesë në planet për të ardhmen.
Kujtojmë që Avdijaj, në fund të muajit dhjetor u pezullua nga klubi për shkak të thyerjes së rregullave dhe gjithashtu muajin e shkuar është larguar nga kampi stërvitor në Spanjë për shkak të lëndimit të gjurit.
Sipas gazetës “Brabants Dagblad”, klubi po kërkon blerës për Avdijajn në Rusi, Poloni, Suedi, Zvicër e SHBA, pasi në këto vende afati kalimtar është ende i hapur (do të nisë sezoni i ri).
22-vjeçari i përfaqësueses së Kosovës, para fillimit të këtij edicioni iu bashkua Willemit, me të cilin ka kontratë deri në fund të sezonit, me mundësi vazhdimi edhe për një vit tjetër. Deri tani ka mundur të shënojë tetë gola dhe ka asistuar gjashtë herë në 19 paraqitje në të gjitha garat. Kartoni i tij, vlerësohet rreth dy milionë euro.
Avdijaj karrierë ka bërë edhe te Schalke, Roda e Sturmi i Grazit. Ai në vitin 2017 ka debutuar me Përfaqësuesen e Kosovës, me të cilën ka realizuar dy gola në gjashtë ndeshje.
