Fantazisti brazilian i Chelseat, Willian ka përfunduar në qendër të merkatos së janarit, me mediet angleze që vazhdimisht kanë shkruar mbi një largim të mundshëm drejt tij, drejt Manchester Unitedit, ku e pret krahëhapur Jose Mourinho.
Gjithsesi, vetë 29-vjeçari i dha fund këtyre hamendësimeve, në një intervistë ku theksoi dashurinë për klubin londinez dhe mohoi të gjitha opsionet e mundshme të largimit në janar.
“Unë jam i dashuruar me Chelsean dhe këtë fanellë. Jam gjithmonë i gatshëm të luaj dhe jap maksimumin sa herë që më kërkohet të zbres në fushë. Asnjëherë nuk jam ankuar për minutazhin në dispozicion, por punoj vazhdimisht që të meritoj fanellën e titullarit. Nuk ka asnjë mundësi largimi në muajin janar dhe as në verë, të paktën nëse klubi nuk dëshiron të më shesë”, u shpreh braziliani.
Willian u bë protagonist në fitoren e djeshme të Chelseat, përballë Huddersfieldit, ku shënoi një gol dhe asistoi 2 të tjerët.
