Xavi Hernández, 43 vjeç, është tashmë pjesë e legjendave të Barcelonës, që kanë arritur të shpallen kampion si lojtarë dhe si trajnerë “blaugrana”.
Fitorja kundër Espanyolit (4-2), të dielën, i mundësoi Barçës të festonte titullin e 27-të në historinë e klubit, i pari me Xavin në komandën teknike të skuadrës.
Një trofe që ish-mesfushori spanjoll e bashkon me tetë tituj që fitoi në La Liga gjatë 16 sezoneve si futbollist.
“Është një ndjenjë e mrekullueshme, një punë e bërë mirë. U deshën dhjetë muaj sakrifica dhe përpjekje. Lojtarët dhe tifozët e meritojnë. Ky titull i jep stabilitet projektit, duhet të ndjekim këtë rrugë”, tha ai pas ndeshjes.
Para Xavit, vetëm katër emra historikë arritën ta fitonin titullin si lojtar dhe më pas si trajner. Ata janë: Josep Samitier (1 si lojtar/1 si trajner); Johan Cruyff (1/4); Pep Guardiola (6/3); dhe Luis Enrique (2/2).
