Futbolli i privon profesionistët e këtij sporti nga shumë evente familjare, për shkak të një kalendari të ngjeshur ndeshjesh, por ky nuk është rasti i Granit Xhakës, që pret që në mesin e muajit të ardhshëm të bëhet baba për herë të parë.
Mesfushori i Arsenalit dhe Zvicrës ka deklaruar se ka vendosur t’i qëndrojë pranë bashkëshortes së tij në këto ditë speciale, për një afat prej të paktën dy javësh, edhe me koston se nuk do të marrë pjesë në ndeshjet e klubit dhe përfaqësueses së tij.
“në jetë ka shumë gjëra mjaft të rëndësishme përtej futbollit. Një nga këto është të bëhesh baba. Me Seferoviç kishim rënë të gjithë dakord që do jepte maksimumin me Irlandën dhe më pas do të ikte për t’i qëndruar pranë të shoqes. E njëjta gjë do të ndodhë edhe me mua”, deklaroi Xhaka.
Bashkëshortja e tij, Leonita Lekaj pritet të lindë rreth mesit të muajit të ardhshëm, kohë kur është planifikuar një tjetër ndërprerje e kampionateve, për t’u lënë vend eliminatoreve, ndërsa mesfushori e ka ndarë mendjen të lërë mënjanë futbollin, për të pritur fëmijën e tij të parë.
