Granit Xhaka iu kthye edhe një herë përplasjes me tifozët e Arsenalin vitin e kaluar, që e detyruan të bënte gati valixhet, por në momentet e fundit ndërroi mendje. Çfarë e bëri mesfushorin shqiptar të bënte prapakthehu atëherë kur thyerja me klubin londinez ishte totale?
“Të gjithë e dinë se çfarë ndodhi mes meje dhe tifozëve. Nuk ishte kohë e mirë, – tha ai për “BT Sport”. – Por, mbase ishte çelësi, sepse u ktheva më i fortë se kurrë, kështu që mësova shumë nga ajo situatë. Shpresoj që edhe fansat të kenë nxjerrë mësime. Gjithmonë thosha me vete, por edhe me tifozët: Hyj në fushë për të dhënë 100 për qind çdo ndeshje. Njerëzit kanë filluar të më kuptojnë gjithnjë e më shumë. Duhet të jem i sinqertë, isha shumë afër largimit nga klubi. Kam pasur, deri në atë moment, një kohë të shkëlqyeshme tek Arsenali. Por, pas asaj që ndodhi, natyrisht e pashë veten shumë poshtë, sepse nuk e prisja nga njerëzit, nga fansat.
Asnjëherë nuk e kisha menduar largimin nga klubi, por pasi asaj që ndodhi, sigurisht që mendova për këtë.
Kur Mikel Arteta erdhi si trajner, pata një takim shumë të mirë me të. Biseduam hapur. Ai më ktheu dhe më dha një shans të dytë, më tha se besonte tek unë. Për këtë, jam përpjekur t’i jap gjithçka.”
Xhakës, në fakt, i duhet “një natë e gjatë dimri” për të mbaruar lëvdatat për Artetan.
“Që kur Mikel ka ardhur në këtë klub, shumë gjëra kanë ndryshuar. Ai ka ndryshuar mentalitetin, shpirtin e grupit. Të gjithë e dinë saktësisht se cila është puna e tyre. Kemi një plan të qartë të lojës. Ai na përgatit vërtet shumë, stërvitemi me lumturi. Me të po bëjmë një punë të mahnitshme”.
27-vjeçari, gjithashtu, u pezullua nga skuadra për pesë ndeshje, por e rifitoi vendin e tij dhe, tetë muaj më pas, është përsëri lojtar i rregullt i formacionit fillestar.
