Manchesteri i Mourinhos ia doli me sukses në transfertën e vështirë ndaj Watfordit, duke fituar me rezultatin 2-4. ‘Djajtë e kuq’ dominuan takimin gjatë gjithë kohës, por në minutat e fundit pati edhe një moment paniku.
Manchester United-i e nisi në mënyrë të shkëlqyer takimin, i drejtuar nga një Ashley Young i papërmbajtshëm, që shënoi 2 supergola brenda 25 minutave të para, ndërsa Anthony Martial dërgon rezultatin në 3-0, në minutën e 32-të.
Dukej se çdo gjë po shkonte për bukuri për skuadrën e Mourinhos, por një 11-metërsh i shndërruar në gola nga Deeney në të 77-ën dhe një gol i Doucoure në të 84-ën, rihapën sfidën dhe komplikuan takimin. Gjithsesi, entuziazmi i vendasve zgjati vetëm 2 minuta, sepse Lingard shënoi golin e 4-t pas një aksioni mjaft të bukur dhe fiksoi rezultatin 4-2.
Pas një fillimi të shkëlqyer të sezonit, Tottenhami duket se është futur në një krizë rezultatesh në Premier League. Skuadra e Pochettinos është mposhtur mbrëmjen e sotme nga Leicester me rezultatin 2-1, duke pësuar humbjen e 3-të në 5 javët e fundit. ‘Dhelprat’ shënuan 2 herë në pjesën e parë, fillimisht me sulmuesin Vardy dhe më pas me fantazistin Mahrez, ndërsa goli i Harry Kane nuk mjaftoi për të shmangur humbjen e londinezëve.
Në takimet e tjera, Brightoni dhe Crystal Palace u ndanë në barazim pa gola, ndërsa sfida West Brom-Newcastle përfundoi 2-2.
Premier League vijon të kryesohet nga Manchester City, me 37 pikë, i ndjekur nga United me 32 dhe Chelsea me 26. Tottenhami, pasi ruajti për shumë javë ritmin e skuadrës së Mourinhos, ka përfunduar në vendin e 5-të me 24 pikë. Java e 14 e kampionatit anglez do të vijojë nesër me 6 takimet e mbetura.