Javier Zanetti u ka dhënë fund hamendësimeve për një largim të mundshëm të kapitenit Mauro Icardi, pasi në një intervistë për Goal.com, theksoi se pikërisht numri 9 i zikaltërve, bashkë me Lautaro Martinezin, do të jenë kopja e sulmit të Interit për shumë vite në vijim.
“Lautaro është një befasi edhe për mua personalish, ndaj jemi të lumtur që e kemi në skuadër. Po punon shumë dhe po përshtatet shpejt me futbollin italian, ndaj nga java në javë, do të shohim rritje të nivelit të tij, por edhe të numrit të golave. Sa i përket Mauros, të gjithë i dimë vlerat e tij dhe jemi të bindur që edhe këtë sezon kapiteni ynë do t’i shënojë golat e tij. Na vjen mirë që kemi një dyshe sulmuesish, që janë miq të mirë me njëri-tjetrin, pasi do të jenë udhëheqësit e ofensivës zikaltër për shumë vite në vijim”, deklaroi kapiteni zikaltër.
Fjalët e Zanettit vijnë në momentin e duhur, pasi situata është agravuar ndjeshëm rreth sulmuesit zikaltër, që prej muajsh kërkon rinovimin nëpërmjet menaxheres dhe gruas së tij, Wanda Narës, ndërsa në përfundim të ndeshjes me Parmën, ndërhyri zyrtarisht edhe trajneri Luciano Spalletti, i cili kërkoi nga klubi që të zgjidhë ngërçin.
