Për herë të fundit ka zbritur në fushë në një ndeshje të Kategorisë Superiore më 28 janar të këtij vitin, në humbjen 1-0 të Flamurtarit në fushën e Skënderbeut. Pas më shumë se pesë muajsh u aktivizua në radhët e Kukësit në përballjen e dyfishtë me Sherifin e Tiraspolit, që fatkeqësisht nuk u mbyll me kualifikimin e kampionëve të Shqipërisë në raundin e tretë të Championsit. Hair Zeqirit i hanë këmbët për të qenë sërish protagonist me me ekipin verilindor, që e nis sezonin e ri përballë Tiranës në Superkupën e Shqipërisë.
“Ka qenë muaji janar kur kam luajtur për herë të fundit në kampionat. Më pas jam aktivizuar me Kukësin në Champions kundër Sherifit të Tiraspolit. Të them të drejtën po pres me padurim të luaj sërish. Ndeshja e parë është Superkupa dhe shpresoj ta nisim me trofe.”
Tre sezone më parë, mesfushori vlonjat u aktivizua në 33 ndeshje të Superiores me Kukësin, pa mundur të ngrejë lart trofeun e kampionit. Diferencat me atë skuadër më shumë se në cilësi Zeqiri i sheh te statusi i grupit aktual, si më i miri i futbollit shqiptar.
“Edhe atëherë kemi qenë një grup shumë cilësor, sikurse sot. Diferenca është vetëm te statusi i ekipit. Sot jemi kampionë të Shqipërisë.”
Kukësi do të tentojë ta mbrojë titullin kampion me një tjetër trajner në stol, serbin Mlladen Milinkovic, të cilin e Ziqiri e vlerëson mbi të gjitha për profesionalizmin e tij.
