Gareth Bale shkëlqen në momentin kur kritikat ndaj tij kishin arritur kulmin. Futbollisti uellsian, në pronësi të Real Madridit hapi dhe mbylli serinë e golave në fitoren e thellë 4-0 të Tottenhamit ndaj Burnley-t në Londër. Sigurisht që suksesi ishte detyrim për skuadrën e Mourinhos edhe për faktin që kishte përballë një kundërshtar të dobët, që pozicionohet në pjesën e poshtme të renditjes dhe lufton për mbijetesë.
Bale e realizoi golin që zhbllokoi takimin që në minutën e 2-të, i shërbyer nga Son Heung-min, ndërsa pa u mbyllur çerek ore lojë asistoi Harry Kane për rezultatin 2-0. Në minutën e 31-të Lucas Moura shënoi golin e 3-0, ndërsa në pjesën e dytë, pikërisht në të 55-tën, sërish i shërbyer nga Son Hung-min, uellsiani e tundi për herë të dytë rrjetën, për rezultatin përfundimtar 4-0. Më këtë dygolësh Bale shkon në kuotën e tri finalizimeve në Premier Legue, ndërsa në total, më të gjitha kompeticionet ka realizuar 8 herë.
Tottenhami mbetet skuadra e dytë me produktive në ligat më të forta në Europë (Bayerni 102) me plot 95 gola në të gjitha garat që kur nisi sezoni.