Roma fiton në “Olimpico” 1-0 ndaj Udineses dhe rrit shpresat për një vend në Champions sezonin e ardhshëm. Një sfidë e vështirë për verdhekuqtë, por që për fatin e tyre të mirë arritën të merrnin 3 pikët.
Pjesa e parë e takimit ishte përgjithësisht e qetë me rastet më të pastra shënimi për vendasit, por edhe Udinese u shfaq rrezikshëm në portën e kundërshtarit. Pak a shumë e njëjta panoramë edhe në pjesën e dytë, ku këtë herë Roma u shfaq akoma edhe më shumë kërkuese, edhe pse në të 57-ën fati ishte me vendasit, teksa goditja e De Maios u ndal nga shtylla.
Sidoqoftë, në minutën e 67-të festa është e gjitha për tifozët verdhekuq, teksa Edin Dzeko mundi t’i jepte epërsinë skuadrës së tij. Për trajnerin Udineses, Igor Tudor, kjo ishte disfata e parë për të që pas rikthimit në stolin e friulanëve, ndërsa për Romën ky ishte suksesi i dytë radhazi.