2 gola dhe 1 asist, Edon Zhegrova, talenti i madh i përfaqësueses së Kosovës, të cilin e dëshironte me çdo kusht edhe Panucci te Shqipëria, ishte padiskutim heroi i Genk në fitoren e thellë edhe në ndeshjen e kthimit ndaj luksemburgasve të Fola Esch në turin e dytë kualifikues të Europa League. Zhegrova u hakmorr në një farë mënyre për eliminimin që Fola i bëri Prishtinës në turin e parë pas goditjes së penalltive. 19-vjeçari finalizoi një aksion model të Genk në minutën e 13-të duke hapur serinë e golave ndërsa u bë protagonist edhe në 2 raste në pjesën e dytë. Fillimisht në minutën e 59-të Zhegrova shërbeu për Gano i cili i çoi shifrat në 0-3, ndërsa 4 minutë më vonë një harkim i ulët i tij nga një goditje standarte përfundoi direkt në rrjetë duke vulosur shifrat përfundimtare të këtij takimi në 1-4. Genk avancoi në turin e tretë të Europa League me rezultat të përgjithshëm 9-1 në favor ndërkohë që Edon Zhegrova në këto dy sfida tregoi se zotëron një talent të jashtëzakonshëm dhe shumë shpejtë nëse vazhdon me këto ritme mund ta shikojë veten në një nga ligat më të rëndësishme europiane.
https://www.youtube.com/watch?v=bWKGlN48Aig
