Paris Saint Germain rinovoi kontratën me teknikun gjerman, Thomas Tuchel, deri në vitin 2021, por që nga nënshkrimi i palëve në muajin mars të këtij viti situata ka precipituar, aq s aka nisur të flitet për prishje të klimës pozitive që ekzistonte në këtë bashkëjetese.
Klubi francez i Al-Khelaifit ishte entuziast për vazhdimësinë më trajnerin 45-vjeçar, duke e vërtetuar një fakt të tillë me rinovimin e kontratës, që sigurisht pati edhe një përmirësim në termat financiarë për të, përkatësisht nga 5 në 7.5 milionë euro në vit, por entuziazmi duket se u shua shpejt, kur pak kohë pasi u arrit kjo marrëveshje PSG u eliminua nga Champions. PSG vërtet ka siguruar trofeun e radhës në Ligën e Parë, por nuk ia doli të ngrinte trofeun e Kupës së Francës, ku u mund në finale nga Rennes me penallti.
Duke mos arritur dot të përmbushte pritshmëritë e larta në kompeticionin europian, mediet franceze flasin tani për krisje të raporteve mes teknikut dhe klubit parizien. Situata paraqitet edhe më e komplikuar jo vetëm për mosarritjen e objektivave madhorë, por edhe për faktin se një divorc me trajnerin me prishje të njëanshme të kontratës do të sillte kosto të lartë financiare.