Shqipëria e vitit 2022 nuk la mbresa pozitive në rrugëtimin e saj në edicionin e tretë të Nations League. E shortuar në Grupin B së bashku me Izraelin, Islandën dhe Rusinë – kjo e fundit e përjashtuar nga UEFA për shkak të ndërhyrjes ushtarake në Ukrainë – përfaqësuesja kuqezi e mbylli në vendin e tretë (praktikisht të fundit) me vetëm dy pikë, duke mos përmbushur pritshmëritë.
Aktiviteti i Kombëtares në vitin 2022 nisi me miqësoren me Spanjën më 26 mars, në Katalunjë, e humbur vetëm në minutat shtesë me rezultatin 2-1 (realizoi Uzuni për kuqezinjtë), ndërsa tri ditë më vonë erdhi barazimi pa gola me Gjeorgjinë, në “Air Albania”.
Rrugëtimi në Nations League
Në fillim të qershorit u luajtën dy ndeshjet e parë të Nations League përballë Islandës në transfertë (1-1) dhe Izraelit në “Air Albania” (1-2) si dhe miqësorja me Estoninë (0-0). Një start zhgënjyes, duke pasur parasysh faktin që në transfertën Islandeze kuqezinjtë nuk ruajtën dot epërsinë (Seferi 30’), ndërsa në Tiranë u përmbysën nga Izraeli 1-2, edhe pse takimi ishte zhbllokuar nga Broja me penallti në fundin e pjesës së parë. Kuqezinjtë, gjithsesi, ishin në lojë për vendin e parë, por në ndeshjet e shtatorit erdhi zhgënjimi i radhës me humbjen 2-1 në Izrael dhe barazimin 1-1 me Islandën. Pra, si konkluzion, dy barazime me Islandën dhe dy humbje me Izraelin, me vendin e fundit (duke mos marrë në konsideratë Rusinë e përjashtuar) të merituar.
Përfundon epoka e trajnerit Edy Reja
Që trajneri Edy Reja nuk kishte çfarë t’i jepte më Shqipërisë, u kuptua qartë me përfundimi e ndeshjeve të Nations League, megjithatë presidenti i FSHF-së, Armand Duka, priti përfundimi e kontratës për t’u ndarë me italianin. 76-vjeçari i drejtoi kuqezinjtë edhe në dy miqësoret e muajit nëntor me Italinë, ndaj së cilës humbëm 1-3 në “Air Albania” dhe me Armeninë, që mposhtëm 2-0. Sfida e fundit me armenët shënon fitoren e vetme të kuqezinjve gjatë vitit 2022. Në tetor, në data jozyrtare, Shqipëria, e përbërë kryesisht nga lojtarë të kampionatit shqiptar, zhvilloi dy ndeshje miqësore me Arabinë Saudite (1-1) dhe Katarin (1-0).
Merkatoja e kuqezinjve, Broja te Chelsea, Asllani tek Interi
Transferimi i Kristjan Asllanit nga Empoli tek Interi për 14 milionë euro ishte pa dyshim një lajm sensacional për dashamirët e Kombëtares. Talenti 20-vjeçar me origjinë nga Elbasani iu bashkua një prej klubeve më të mëdha në Itali dhe Europë. Një lëvizje e bujshme për një lojtar kuqezi, që konsiderohet një talent i padiskutueshëm, pavarësisht se gjatë muajve të parë me fanellën zikaltër edhe nuk ka mundur të aktivizohet në vazhdimësi.
Një tjetër lajm i bujshëm ishte qëndrimi i Armando Brojës te Chelsea, pavarësisht aludimeve të shumta për një tjetër huazim në Premier League, pas përvojës mjaft pozitive të kaluar te Southmaptoni.
21-vjeçari, i aktivizuar si zëvendësues gjatë fazës së parë, u dëmtua rëndë në një ndeshje miqësore me Aston Villën, duke këputur ligamentet e gjurit, që do të thotë se ka humbur pjesën e mbetur të sezonit.
Kosova, e dyta në Nations League
3 fitore dhe po kaq humbje: ky ishte bilanci i Kosovës në edicionin e tretë në Nations League, por që i mjaftoi për t’u renditur në vendin e dytë (9 pikë) në Grupin 2 të Ligës C, pas Greqisë (15 pikë), duke lënë pas Irlandën e Veriut dhe Qipron.
Kosova e nisi me bujë vitin 2022 falë fitores së thellë 5-0 ndaj Burkina Fasos dhe barazimit 1-1 me Zvicrën (realizoi Milot Rashica) në Zyrih. Edhe starti i Nations League ishte mbresëlënës me fitoren 0-2 në fushën e Qipros më 2 qershor, por vetëm tri ditë më vonë dardanët humbën 0-1 në “Fadil Vokrri” ndaj Greqisë, rezultati që i uli mjaft shanset për vendin e parë. Më 9 qershor erdhi fitorja 3-2 me Irlandën e Veriut, që e pozicionoi direkt Kosovën në vendin e dytë. Në muajin shtator erdhën dy humbjet radhazi, 2-0 në Greqi dhe 2-1 në fushën e Irlandës së Veriut, megjithatë skuadra e drejtuar nga Alain Giresse e ruajti vendin e dytë falë fitores së thellë 5-1 me Qipron në “Fadil Vokrri”.
Përfaqësuesja e Kosovës e mbylli aktivitetin e saj gjatë vitit 2022 me dy ndeshje miqësore me Armeninë dhe Ishujt Faroe, të përfunduara përkatësisht 2-2 dhe 1-1.
“Ylli” i Mallorcas, Vedat Muriqi, futbollisti i vitit në Kosovë
Në mbrëmjen gala të organizuar para festës së Krishtlindjes, Vedat Muriqi u nderua me çmimin e futbollistit të më të mirë Kosovar. Shtatlarti i lindur në Prizren u bë lajm gjatë merkatos së verës kur dështoi kalimi i tij në kampionatin belg në radhët e Club Brugge (u tha që nuk kishte kaluar testet fizike), për t’u rikthyer te Mallorca, aty ku kishte dhënë kontribut thelbësor për qëndrimin e ishullorëve në LaLiga (i huazuar nga Lazio).
Drejtuesi e Mallorcas bënë një sforco ekonomike për të blerë kartonin e Muriqit nga Lazio, por sigurisht që nuk janë penduar, pasi sulmuesi dardan është golashënuesi i tretë më i mirë i LaLigas me 8 gola, aq sa Inglesias (i dyti, me një asist më shumë se Muriqi) dhe pesë më pak se Robert Lewandowski.
