Pas ndërprerjes së bashkëpunimit me trajnerin Agim Sopi, Feronikeli ka vendosur që drejtimin e skuadrës t’ia besojë trajnerit nga kryeqyteti, Afrim Toverlani, i njohur për publikun si “Toki”. Ai është ndër trajnerët më të suksesshëm të Superligës së Kosovës dhe po rikthehet në skuadrën nga Drenasi pas trofeve të fituar në sezonet 2014/15 dhe 2015/16.
Afrim Toverlani ka lindur në Prishtinë, më 17 janar 1967 dhe pati një karriere të bujshme si futbollist, me Prishtinën dhe Flamurtarin.
U paraqit edhe me Përfaqësuesen e Kosovës në ndeshjen e vitit 1993, në miqësoren ndaj Shqipërisë, që atë kohë u cilësua si ndeshje jozyrtare. “Toki”, pas karrierës si futbollist nisi atë të trajnerit, duke fituar gjithsej 6 trofe në Kosovë.
Ai u shpall Kampion i Kosovës tri herë me Prishtinën gjatë sezoneve: 2007/08, 2008/09 dhe 2012/13. Po ashtu me Prishtinë fitoi edhe Kupën e Kosovës gjatë sezonit 2012/13.
Kjo është hera e dytë që Toverlani merr drejtimin e Feronikelit, pasi gjatë viteve 2015-17 arriti të shpallej kampion i Kosovës në sezonin 2015/16 dhe fitoi Kupën e Kosovës në sezonin 2014/15.
Toverlani e merr Feronikelin në vendin e pestë, me 31 pikë, në vendin e 5-të. Gjithashtu skuadra nga Drenasi është kualifikuar në gjysmëfinale të Digitalb Kupës së Kosovës si kundërshtar Ballkanit.
