Southampton ka emëruar sot trajnerin e ri të skuadrës. “Shenjtorët” shkarkuan Ralph Hasenhuttl tri ditë më parë. Aventura 4-vjeçare e teknikut austriak në stolin e ish-ekipit të Armando Brojës përfundoi pas humbjes 1-4 me Newcastle.
Drejtuesit e Southamptonit kanë vendosur t’i besojnë postin e trajnerit Nathan Jones. 49-vjeçari nga Uellsi ka drejtuar më parë klube si Luton dhe Stoke City, teksa provoi edhe një aventurë të shkurtër në pankinën e Brighton si trajneri i përkohshëm.
Jones ka firmosur kontratë me Southamptonin deri në vitin 2026. Ai do të debutojë në “Anfield” përballë Liverpoolit, teksa objektivi primar është sigurimi sa më shpejt i mbijetesës. Southampton renditet në vendin e tretë nga fundi në Premier League.
