Mirel Josa nuk është më trajner i Laçit. Vendimi është bërë i ditur nga vetë klubi kurbinas në faqet zyrtare në rrjetet sociale, teksa fatale ka rezultuar humbja e djeshme ndaj Partizanit, 2-1 në “Elbasan Arena”.
Tekniku kryeqytetas mori drejtimin e kurbinasve më 24 tetor, në javën e 7 të Abissnet Superiores, kur zëvendësoi malazezin Dejan Vukiçeviç dhe i ndërroi menjëherë fytyrën skuadrës, duke e shndërruar në pretendente për titull.
Megjithatë humbja me Tiranën 4-1 në kryeqytet më 26 shkurt, është pasuar me një sërë rezultatesh negative, pasi në 6 ndeshjet e radhës në kampionat, ka marrë 3 humbje e tre barazime.
Gjithsesi kurbinasit kanë fituar sfidën e parë gjysmëfinale të Kupës së Shqipërsë ndaj Teutës dhe janë pretendentë për të kaluar në finale.