E shtuna ishte ditë largimesh por edhe afrimesh te Vllaznia. Pas Eni Imamit nga shkodranët u largua zyrtarisht edhe Haris Dilaver njeriu që mbajti peshën e sulmit te kuqeblutë sezonin e kaluar. Afrimi i kroatit Ante Aralica i ka hapur rrugën e largimit bomberit bosnjak i cili nuk ka gjetur gjuhën e përbashkët me drejtuesit e klubit shkodran për të rinovuar kontratën dhe ka mbyllur zyrtarisht bashkëpunimin me Vllazninë. Dilaver ishte një nga pikat më të forta të skuadrës së Brdaric në sezonin e kaluar teksa mes kampionatit dhe Kupës së Shqipërisë arriti të realizonte 15 gola. Në përfaqësimin e Vllaznisë në Kupat e Europës, Dilaver edhe pse u aktivizua në të gjitha ndeshjet nuk arriti të linte shenjë dhe kjo ishte një nga arsyet që solli edhe krisjen mes palëve.
NJOFTIMI – KF Vllaznia njofton opinionin sportiv se ka mbyllur bashkëpunimin me futbollistin Haris Dilaver. KF Vllaznia e falenderon lojtarin për kontributin e dhënë për skuadrën tonë gjatë sezonit të kaluar si dhe në fitimin e trofeut të Kupës së Shqipërisë, e po ashtu edhe në ndeshjet e Kupave të Europës dhe i uron suksese në karrierën e tij të mëtejshme. Faleminderit Haris Dilaver!