Rinovim te Kukësi. Klubi i Superiores ka zgjatur bashkëpunimin me Angelo Tafas, portierin që mbylli sezonin e dytë me verilindorët.
21-vjeçari, një titullar fiks i Kukësit, ka firmosur deri në vitin 2025. Tafas ka luajtur më parë me Shqipërinë U21, teksa është grumbulluar edhe me kombëtaren e madhe.
“FK Kukësi njofton se ka arritur marrëveshjen me portierin Angelo Tafas për të rinovuar kontratën edhe për 3 sezone të tjera. Portieri 21-vjeçar ka firmosur sot kontratën e re e cila skadon në verën e vitit 2025, duke zgjatur në këtë mënyrë bashkëpunimin.
Tafas erdhi të Kukësi në sezonin 2020-2021 duke qenë një nga lojtarët më të rëndësishëm në ekip. Tafas është grumbulluar edhe nga Kombëtarja duke u aktivizuar me Shqipërinë U21. Klubi i Kukësit i uron suksese portierit Tafas”, lexohet në komunikatën zyrtare të klubit shqiptar.
Drejtuesit e Kukësit firmosën katër ditë më parë me mbrojtësin Antonio Ilieski, mesfushorin Kristi Kote dhe sulmuesin Ante Zivkovic, ndërkohë që po punojnë për të rinovuar me kapitenin Gjelbrim Taipi.
