Mario Mandzukic vendosi të mbyllë karrierën si futbollist në muajin korrik, por nuk mund të qëndrojë larg lojës më të bukur në planet.
35-vjeçari, i cili ka luajtur me klube si Bayern Munchen, Juventus, Milan dhe Atletico Madrid, ka zgjedhur të nisë aventurën si trajner.
Ish-sulmuesi kroat, ka arritur akordin me Federatën e vendit të tij dhe do të jetë një nga ndihmësit e Zlatko Dalic në stolin e nënkampionëve të botës.
Trajneri i Kroacisë beson shumë tek eksperienca e “gjigantit” ballkanas, i cili shënoi 33 gola në 89 ndeshje të luajtura me kombëtaren kroate, duke ia dalë të fitojë medaljen e argjendtë në Botërorin Rusi 2018.
Zyrtarizimi ka ardhur ditën e sotme dhe Mandzukic është gati të japë kontributin e tij dhe të mësojë sa më shumë nga profesioni i ri.