Koronavirusi vuri në rrezik serioz edhe zhvillimin e dy ndeshjeve miqësore që kishte në program kombëtarja shqiptare në fund të muajit mars. Por nëse sfida me San Marinon për në datë 27 mars po shkon drejt anulimit për shkak të situatës së rënduar në territorin italian, takimi ndaj Sllovenisë në 30 mars do të luhet por jo në Udine siç ishte vendosur fillimisht por në qytetin slloven të Koperit. Ka qenë vetë federata sllovene e futbollit që ka zyrtarizuar datën dhe vendin ku do të luhet sfida ndaj kuqezinjëve. Takimi do të luhet në Koper në datën 30 mars në orën 20:45, një lajm i mirë ky për trajnerin e kombëtares shqiptare Edi Reja i cili do të kërkojë të provojë sa më shumë lojtarë të rinj në këtë sfidë.
