Dy muaj pas dramës së rënies nga kategoria dhe tashmë më në fund ka ardhur hapi i parë drejt rindërtimit të klubit dhe të skuadrës. Pauza e gjatë te Vllaznia ka përfunduar, me kuqeblutë që emëruan zyrtarisht Suad Licin në postin e administratorit të klubit.
Një pozicion i mbetur vakant dhe që ndikoi jo pak në bllokimin e funksionimit të skuadrës, pasi firma e administratorit shërbente edhe për prishjen e kontratave me lojtarët e edicionit të kaluar, për afrimin e futbollistëve të rinj apo edhe për organizimin e ekipit dhe përgatitjeve për sezonin e ri.
Vllaznia njoftoi nëpërmjet faqes së saj zyrtare se “pas shqyrtimit të disa kandidaturave, vendosi që në postin e administratorit të emërojë z. Suad Lici. Një emër i tillë natyrisht që është shumë i njohur nga i gjithë ambienti sportiv shkodran dhe shqiptar, si një futbollist që ka lënë gjurmën e tij gjatë aktivizimit shumëvjeçar me Vllazninë, por edhe me kombëtaren shqiptare”.
Klubi shpjegoi gjithashtu se zgjedhja e 44-vjeçarit është bërë prej formimit akademik dhe suksesit në sipërmarrjet provate, me drejtuesit e shoqërisë aksionere në Shkodër që besojnë se Lici është zgjedhja e duhur për të udhëhequr klubin drejt rikthimit në elitë.
Pas emërimit të administratorit, tashmë te Vllaznia do të nisë puna në merkato, për krijimin e skuadrës së re, që do të synojë menjëherë ngjitjen në Kategorinë Superiore. Për ndërhyrjet në merkato Suad Lici do të bashkëpunojë me trajnerin Hasan Lika, emërimi i të cilit në stolin kuqeblu duket vetëm një formalitet.