Pas Albano Aleksit nga Teuta, Tirana ka bërë një tjetër afrim, megjithatë këtë herë lojtari i afruar vjen nga Hungaria për të luajtur për herë të parë në Shqipëri.
Florent Hasani është prezantuar ditën e sotme nga klubi “bardheblu” përmes një video të postuar në rrjetet sociale, krahas së cilës shkruhet: “Florent Hasani është lojtari më i ri që shtohet në radhët e ‘bardhebluve’. Sulmuesi pas kryerjes së analizave ka hedhur firmën që e bën pjesë të klubit kampion. 25-vjeçari do t’i bashkohet skuadrës në stërvitjen e radhës për t’u vënë menjëherë nën urdhrat e trajnerit Shehi.”
Ish-lojtari i Gyirmot, në Hungari, sezonin që sapo u mbyll luajti 1808 minuta ose thënë ndryshe 32 ndeshje dhe realizoi tre gola, ndërsa ish skuadra e tij, nuk ia doli të mbijetonte në elitën e futbollit hungarez, pasi u rendit në vendin e fundit.
Gjithashtu, Hasani ka qenë pjesë e kombëtares së Kosovës, ndërsa pjesën më të madhe të karrierës e ka zhvilluar në Hungari, ku më parë ka luajtur edhe për skuadrën e Diosgyor për katër sezone, pa harruar një aventurë të shkurtër në Israel me Hapoel Kfar Saba.
View this post on Instagram