Vllaznia e gjen shpejt zëvendësuesin e Eni Imamit. Skuadra shkodrane ka prezantuar zyrtarisht qëndërmbrojtësin Fallou Diagne i cili ka firmosur për 1 vit me shkodranët. Diagne i cili stërvitjej prej ditësh me Vllazninë ka një eksperiencë të madhe mbi supe pasi shtatlarti senegalez në karrierën e tij ka luajtur me Rennes e Metz në Francë e Werder Bremen në Gjermani madje ka arritur të shënojë dhe 6 gola në ligën e parë franceze dhe dy në Bundesliga. Rennes dhe Werder Bremen kanë shpenzuar nga 1,5 milionë euro për të blerë kartonin e tij, ndërkohë që problemi i vetëm i Diagne është që nuk luan një ndeshje zyrtare që nga 30 nëntori i 2019-ës, kur ishte pjesë e Konyaspor në Superligën turke. Ka qenë vetë Vllaznia që ka zyrtarizuar afrimin e 31-vjeçarit afrikan.
“Mbrojtësi Fallou Diagne nga sot është pjesë e KF Vllaznia. Mbrojtësi senegelaz me nënshtetësi franceze ka firmosur një kontratë me klubin tonë dhe do të jetë pjesë e tij për sezonin e ardhshëm futbollistik. Ne shpresojmë që përvoja e jashtëzakonshme që ai ka fituar gjatë karrierës së tij, të vihet në shërbim të skuadrës tonë, për arritjen e objektivave që ajo do të ketë në sezonin e ri.
Mirë se erdhe Fallou Diagne!”, lexohet në postimin e klubit shkodran.
