Bengt Persson, një zyrtar i EULEX, është personi i parë që i ka dhënë ndihmën Fadil Vokrrit, pas infarktit në zemër, në një qendër fitnesi në Prishtinë.
Zyrtari policor i EULEX-it kishte qëlluar rastësisht në qendrën e fitnesit, kur kishte parë se Vokrrit i ishte komplikuar gjendja shëndetësore dhe kishte rënë pa ndjenja.
Indeksonline e ka kontaktuar zyrtarin suedez, i cili vetëm pas kontaktit me gazetarët e mësoi se kreu i Federatës Kosovare të Futbollit kishte ndërruar jetë.
“Ai ka ndërruar jetë!? Jam shumë i mërzitur që po e dëgjoj këtë lajm. Ishte pa ndjenja kur unë ndërhyra. Fillova ta ndihmoj dhe më pas nisi të marrë frymë. Pasi u duk se po i përmirësohej gjendja, unë e lash në duart e stafit mjekësor, të cilët e transportuan në spital. Sinqerisht, më vjen shumë keq. Ndihem i trishtuar”, ka thënë Persson.
