Egnatia është një nga klubet e Superiores që po lëviz më së shumti në merkato. Rrogozhinasit që siguruan qëndrimin në elitë vetëm në ndeshjen e Play-Out, kërkojnë që në sezonin e ri të jenë autor të një paraqitje tjetër. Në këtë formë, drejtuesit po investojnë duke afruar shumë emra të rinj ndërsa së fundmi është prezantuar një sulmues.
Fjala është për Flavjo Meçja i cili ka nënshkruar një kontratë katërvjeçare me Egnatian. 21-vjeçari në sezonin e shkuar ishte pjesë e Besës së Kavajës në Kategorinë e Parë, megjithatë tashmë ka mundësinë e artë për të provuar për herë të parë në karrierë një eksperiencë në Superiore.
Kujtojmë se ky ishte zyrtarizimi i dytë brenda ditës për rrogozhinasit të cilët më herët prezantuan mesfushorin Arbin Fejzullai. Sakaq, Supersport mëson se te Egnatia janë në pritje edhe të një fantazisti brazilian që do të vijë nga Serie B e Brazilit.
