Përpara ndeshjes Juventus-Bologna, Paulo Dybala ishte njeriu i cili kishte nevojë më shumë për një mbrëmbje të madhe. Pesë ndeshje, 3 nga të cilat titullar, pa shënuar. Një nivel loje i pranueshëm për një futbollist normal, por jo për një kampion që i duhet edhe shumë pak për shpërthimin përfundimtar.
Ishte data 5 maj kur argjentinasi shënoi golin e fundit në kampionat nga sezoni i shkuar, ku totali ishte 22. Ishte goli i tretë në ndeshjen e cila u mbyll 3-1, pikërisht kundër Bolognas. Për herë të parë në këtë sezon, 24-vjeçari mbuloi sulmin bardhezi së bashku me Cristiano Ronaldon. Në këtë mënyrë, Dybala mund të bënte atë që donte, si një numër 10 tipik.
Ish-lojtari i Palermos ishte arsyeja kryesore që Juvja arriti ta mbyllte ndeshjen për pak më shumë se 15 minuta. Asist për Matuidi, mrekulli e Skorupskit tek goditja e francezit, e më pas një goditje mjaft e bukur e argjentinasit, i cili çoi rezultatin 1-0. Tek goli i dytë ishte po Dybala që dha krosimin për Ronaldon e ky i fundit e ktheu topin po tek Matuidi, i cili nuk gaboi për të dytën herë. Lëvizjet e tij prej një lojtari klasi fituan duartrokitjet e të pranishmëve në stadium, si për të konfirmuar se “La Joya” ishte në ditën më të mirë. Sigurisht, nuk mjafton një ndeshje e bukur me Bolognan për të thënë se Dybala është rikthyer, por sezoni i tij fillon tani.
