Emanuel Egbo do të drejtojë Tiranën në ndeshjen e pestë si trajner i parë, teksa katër të parat i ka fituar. Përballë bardhebluve është Luftëtari i parafundit të tabelës, një fakt që shton presionin e fitores te kryeqytetasit.
“Tirana është në rrugën e duhur sa u përket rezultateve. E kam thënë gjithmonë, do t’i marrim ndeshjet një e nga një. Duhet të marrim sa më shumë fitore dhe në fund të bëjmë llogaritë.”
Asnjë nënvlerësim: E kam thënë gjithmonë që nuk ka ekipe të vogla. Janë 11 lojtarë kundërshtarë në fushë dhe ai që vrapon më shumë dhe bën me pak gabime e fiton ndeshjen. E kemi vlerësuar shumë Luftëtarin, pasi kam djem të rinj që vrapojnë dhe do të përdorin shumë kundërsulmin. Jemi gati ta përballojmë sido që të luajë kundërshtari.
S’ka eufori: Nuk besoj se ka vend për eufori, edhe çunat e dinë. Është rruga e gjatë deri në fund të kampionatit dhe duhet të jemi me këmbë në tokë.
Sidibe dhe merkatoja: Deri në momentin e fundit do të shohim, mund të ketë dhe një surprizë tjetër.
Tirana pretendente: Sapo ka nisur faza e tretë, kështu që nuk po mendoj për titullin, por për ndeshjen e radhës. Llogaritë i bëjmë në fund.
Kukësi-Partizani: Nuk merrem me ndeshjet e tjera, por me ekipin tim. Nëse ne marrim maksimumin, jam në rregull. Sa më shumë ndeshje të fitojmë, aq më shumë do të ketë besim skuadra.
