Tjetër zhgënjim për Romën pas disfatës së rëndë në derbi me Lazion. Skuadra verdhekuqe u eliminua nga Spezia në Kupën e Italisë me rezultatin 2-4 pas 120 minutave lojë. Një dështim i papranueshëm për ekipin e Fonsecas, që largohet para kohe nga kompeticioni, edhe pse shorti i kishte rezervuar një kundërshtare relativisht të lehtë.
Roma e nisi në mënyrën më të keqe të mundshme sfidën me Spezian, duke pësuar dy herë brenda çerek ore lojë. Takimin e zhbllokoi Galabinov nga pika e bardhë e penalltisë, pas ndërhyrjes së gabuar të Cristantes, ndërsa në të 15-tën dyfishoi Saponara, i shërbyer në këtë rast nga autori i golit të parë.
Në fundin e pjesës së parë, Pellegrini i Romës shkurtoi diferencën me 11-mëtërsh, për të ardhur më pas tek minuta e 73-të, kur Mkhitaryan barazoi 2-2. Gjithsesi, brenda kohës së rregullt dhe në gjashtë minutat shtesë rezultati nuk ndryshoi, kështu që për të përcaktuar fituesin do të luheshin edhe dy pjesë nga 15 minuta.
Sapo nisi 15-minutëshi i parë shtesë, Mancini u tregua i pakujdesshëm në ndërhyrje, duke marrë kartonin e dytë të verdhë e pak çaste më vonë edhe portieri Lopez gaboi rëndë në dalje, duke u ndëshkuar direkt me karton të kuq. Spezia, në superioritet numerik (dy lojtarë më shumë), mundi të shënonte golin e tretë me Verden në minutën e 107-të, ndërsa në të 19-tën Saponora sigloi të katërtin me një parabël. Roma e pati të pamundur ta ndryshonte fatin e ndeshjes, duke dalë kokulur nga Kupa e Italisë, vetëm pak ditë pas disfatës së rëndë në derbi me Lazion.
Në këtë takim pati një derbi mes mbrojtësve kuqezi Marash Kumbulla dhe Ardian Ismajli, të dy titullarë, por në fund, kuptohet, festa ishte për futbollistin e Spezias, që në çerekfinale do të përballet me Napolin.
