Policia e Shtetit ka njoftuar se ka proceduar penalisht tre tifozë pas ndeshjes së Superiores mes Tiranës dhe Vllaznisë në Air Albania. Gjatë kësaj sfide, tifozët nuk patën një sjellje korrekte duke qenë se flakadanët dhe stolat e thyer u kthyen në një problem.
Në këtë formë, pikërisht për veprimet e dhunshme para dhe pas ndeshjes, por edhe për stolat e thyer janë identifikuar tre tifozë të cilët janë proceduar penalisht. Ndërkaq, policia në njoftimin e saj bën të ditur se vazhdojnë hetimet për të identifikuar të tjerë tifozë të përfshirë.
Njoftimi i Policisë së Shtetit:
Tiranë
Ushtruan veprime të dhunshme gjatë dhe pas ndeshjes Tirana-Vllaznia, procedohen penalisht 3 shtetas
Specialistët për Hetimin e Krimeve në Komisariatin e Policisë Nr. 1, në vijim të veprimeve hetimore për situatën e krijuar gjatë dhe pas ndeshjes Tirana-Vllaznia të zhvilluar mbrëmjen e djeshme në stadiumin “Air Albania”, bënë identifikimin, shoqërimin dhe proceduan penalisht shtetasit, të cilët gjatë ndeshjes hodhën flakadanë në fushë dhe pas përfundimit të saj ushtruan veprime të dhunshme, duke dëmtuar stolat e stadiumit.
Nga shërbimet e Policisë u proceduan penalisht shtetasit A. F., 26 vjeç, B. K., 33 vjeç dhe E. S., 26 vjeç, pasi gjatë zhvillimit të ndeshjes kanë kryer veprime të kundraligjshme duke ndezur flakadanë, hedhur lëndë piroteknike në fushë, thyer stola.
Vijojnë veprimet hetimore për dokumentimin e plotë të këtij rasti, identifikimin dhe shoqërimin e personave të tjerë që kanë ushtruar veprime të dhunshme gjatë aktivitetit sportiv.
Materialet i kaluan Prokurorisë pranë Gjykatës së Shkallës së Parë Tiranë, për veprime të mëtejshme procedurale.