Lionel Messi dhe Achraf Hakimi dy prej afrimeve të mëdha të PSG në merkaton e verës së shkuar, ende nuk janë përshtatur si duhet me mekanizmat e lojës së skuadrës së drejtuar nga Mauricio Pochettino. Gjithsesi Marco Verrati lideri i mesfushës së skuadrës pariziene ka bindjen se shumë shpejt Messi dhe Hakimi do të përshtaten plotësisht me PSG-në dhe loja e tyre do të vijë në rritje, duke qenë një plus i madh për skuadrën.
“Është e vërtetë që me rolin tim duhet të kuptoj më shpejt lojën e prurjeve të reja dhe të rris cilësitë e tyre. Të gjithë e njohin Messin apo Hakimin, por në fushë është tjetër gjë. Nuk është e vështirë të luash me këtë lloj lojtarësh. Është e lehtë të bësh një pasim te Mbappé sepse edhe nëse e jep shumë gjatë, ai e rikuperon me shpejtësinë e tij. Është e lehtë t’i pasosh Messit, i cili mund të bëjë kontroll të jashtëzakonshëm me këmbët që ka. Kjo është arsyeja pse unë mendoj se këtyre lojtarëve u duhet vetëm kohë për të ndërtuar diçka kolektive dhe jam i sigurt se do të ndodhë së shpejti”, theksoi Marco Verrati.
