Marash Kumbulla rikthehet në fushë. Mbrojtësi i talentuar i Kombëtares Shqiptare la pas dëmtimin e rëndë, që e mbajti për plot 10 muaj larg fushave, për t’u aktivizuar në minutën e 77’ të ndeshjes Sassuolo-Napoli.
Një rikthim mjaft i rëndësishëm për mbrojtësin kuqezi, që zbriti në fushë në një moment kur llogaritë ishin mbyllur dhe Napoli kryesonte 1-6, megjithatë në këtë situatë, minutat në fushë janë shumë të rëndësishme për futbollistin.
Marash Kumbulla u dëmtua rëndë në 29 prill të vitit të kaluar, në ndeshjen mes Romës dhe Milanit dhe u detyrua t’i nënshtrohej një operacioni që e mbajti shumë gjatë larg fushave.
Mbrojtësi kuqezi u largua nga Roma në janar, për t’u bashkuar me Sassuolon në huazim, në mënyrë që të marrë sa më shumë minuta dhe të gjejë formën më të mirë, për të dhënë kontributin e tij me Shqipërinë në Euro 2024.