E pabuesueshme ajo që ndodhi në De Kuip pasditen e kësaj të diele. Feyenoord arriti një fitore të madhe ndaj rivalëve të përjetshëm të Ajaxit të Amsterdamit. Skuadra nga Roterdami luajti tenis përballë harkëtarëve pavarsisht se nuk ka shumë pretendime në këtë sezon ndërkohë që Ajaxi lufton për titullin kampion. 6-2 ishte rezultati final i një sfide të çmendur në të cilën realizoi dy herë edhe veterani Robin Van Persie, dy gola deçizivë ata të ish sulmuesit të Arsenalit që e çuan rezultatin nga 2-2 në 4-2. Edhe pse kaloi i pari në avantazh me danezin Lasse Schone, Ajaxi u turpërua në De Kuip dhe pas kësaj sfide e sheh veten -5 pikë nga PSV Eindhoven që kryeson renditjen e Eredivisies. Feyenoord në krahun tjetër edhe pse është larg objektivave sezonale teksa ka blinduar vendin e 3-të por e ka të pamundur të shkojë më lart, pasi i shkaktoi disfatën e parë sezonale PSV-së i dha një leksion edhe Ajaxit.
